پکارتی ہے مرا نام اندریں کوئی شے

 پُکارتی ہے مِرا نام اندریں کوئی شے

اُلٹ کے دیکھ لیا خود کو پر نہیں کوئی شے

تجھے خلوص کے دو گُھونٹ تک نہیں ملنے

کہیں بھی جا، تُو فقط ہے مِرے تئیں کوئی شے

بچھڑ گئے مِرے سب یار کشتیوں والے

نِگل گئی ہے انہیں کیا سمندریں کوئی شے

میں جب کہیں مِری تنہائیوں سے ملنے لگا

تو دندناتی ہوئی آ گئی وہیں کوئی شے

نہ جانے کون سے خدشات اُڑان بھرتے ہیں

پھڑکتی رہتی ہے سینے میں بے یقیں کوئی شے

فضل عباس