وہم ہے یا وہ ابھی موجود ہے

 وہم ہے یا وہ ابھی موجود ہے

چُھو کے دیکھو کیا کوئی موجود ہے

سب لُٹا دوں گا شبِ تاریک میں

مجھ میں جتنی روشنی موجود ہے

داستاں میں لطف باقی ہے ابھی

اس میں اب تک اک پری موجود ہے

میرے منہ سے ہر نکلتی صَوت میں

ایک گہری خامشی موجود ہے

چادرِ سبزہ وہیں بِچھ جائے گی

جس طرف تھوڑی نمی موجود ہے

میرے پہلے رنج کے چارہ گرو

کیا کوئی اس بار بھی موجود ہے؟

بعد والا عشق تو ہم میں نہیں

ابتداء کی دوستی موجود ہے

جس طرف میں دیکھتا ہوں، اس طرف

تیری نا موجودگی، موجود ہے

اس کو مَس کر کے بنے صرصر صبا

اس میں کتنی تازگی موجود ہے

جس کا دعوے دار ہوں، وہ معجزہ

مجھ میں عادل! واقعی موجود ہے

عادل حسین