ہاں اے فقیر شہر دل آزار دیکھنا

 آپ وہ اور میں (سہ رنگی کلام؛ نظم، نظم، غزل)

٭٭٭٭ آپ:: نظمیہ رنگ ٭٭٭٭

ہاں اے فقیرِ شہرِ دل آزار دیکھنا

گھر سے نکل کے وقت کی رفتار دیکھنا

پڑھنا ہر ایک چہرے پہ لکھے ہوئے حروف

ہر موڑ پر نوشتۂ دیوار دیکھنا

ہر شام جا کے دیکھنا جلسے عوام کے

ہر روز اٹھ کے صبح کا اخبار دیکھنا

سرگوشیوں پہ فوج نے پہرے بٹھا دئیے

مُہرِ سِتم ہے بر لب اظہار دیکھنا

زاغ و زغن کو دیکھنا شاخِ گلاب پر

مُرغانِ خوش نوا کو گرفتار دیکھنا

تقریر میں ہو بحث تقاضوں کا وقت کے

سر پر لٹک رہی ہے جو تلوار دیکھنا

منبر رسولؐ کا ہے امانت رسولؐ کی

چشمِ ہوس سے اس کو نہ زنہار دیکھنا

سورج نکل رہا ہے، نگاہیں جھکی رہیں

سر سے نہ گر پڑے کہیں دستار دیکھنا

٭٭٭٭ وہ:: نظمیہ رنگ ٭٭٭٭ 

ہاں اے فقیرِ شہرِ دل آزار دیکھنا

دیکھا نہ ہو تو عظمتِ کردار دیکھنا

بازو کٹے ہوئے ہیں تو سر دھڑ سے ہے جدا

مرتے ہیں اس طرح سے وفادار دیکھنا

دیکھا لبِ فرات تنِ پاش پاش کو

سرورؑ کا سر، یزید کا دربار دیکھنا

نکلے تو کوفیوں کی صفوں سے کوئی نہیں

پھر تابشِ سنانِ علمدار دیکھنا

نیزے پہ سر حسینؑ کا زینبؑ برہنہ سر

کیا کیا سجے ہیں شام کے بازار دیکھنا

کوتل فرض کو دیکھنا میدانِ جنگ میں

دریا ہے کس طرف کو مرے یار دیکھنا

وہ ناوکِ دو شاخ کماں سے جدا ہوا

گھوڑے سے گر پڑا کوئی اسوار دیکھنا

وہ کشتیاں کسی نے جلا دیں کنارِ بحر

شوقِ شہادتِ دلِ ابرار دیکھنا

وہ کوڑیوں کے مول بکا حسنِ بے نظیر

مقدور ہو تو مصر کا بازار دیکھنا

وہ جل کے راکھ ہو گیا اک پھول سا بدن

شعلوں میں کِھل رہا ہے گُلِ نار دیکھنا

وہ سامنے ہے زہر کا پیالہ دھرا ہوا

سقراط ہو تو گرمئ گفتار دیکھنا

سرمد بھی ہیں، مسیح بھی، منصور بھی یہاں

کس کس کو کھینچتے ہیں سرِ دار دیکھنا

سیفو کا، طاہرہ کا، دمن کا معالِ شوق

اے ساکنانِ کوچۂ دلدار دیکھنا

٭٭٭٭ میں:: غزلیہ رنگ ٭٭٭٭ 

ہاں اے فقیرِ شہرِ دل آزار دیکھنا

مجھ بے نوا کو طالبِ دیدار دیکھنا

میں بھی طلسمِ ہوشربا کا اسیر ہوں

میری طرف بھی چشمِ فسوں کار دیکھنا

لیویں نہ جن کا نام ستمگر کہے بغیر

ان سے وفا کا میں ہوں طلبگار دیکھنا

میں دشمنوں کے شہر میں تنہا مقیم ہوں

مجھ سے بچھڑ گئے مِرے غمخوار دیکھنا

زریاب کون، سیف کدھر، سالمی کہاں

اب میں ہی رہ گیا ہوں سرِ دار دیکھنا

پھر بال بال خون میں بھیگا ہوا ہوں میں

اب شرمسارئ نگہِ یار دیکھنا

مجھ غمزدہ کو دیکھنا سر خم کیے ہوئے

اس مہ جبیں کے ہاتھ میں تلوار دیکھنا

کس میرا جسم ڈھونڈنا دریا کی گود میں

امشب ہے مُلتفت وہ ستمگار دیکھنا

اصغر گورکھپوری

آج اس سہ رنگی کلام کی ایک وڈیو نظر سے گزری، پہلے تو خود کئی بار سنی۔

پھراسے اردو میں منتقل کیا تاکہ آپ بھی اس سے لطف اندوز ہو سکیں۔