جونہی اس حسنِ فسوں خیز پہ تنقید بڑھی
میرا آواز اٹھانا تھا کہ تائید بڑھی
بے سبب آنکھ لپکتی نہیں منظر کی طرف
پھول نے رنگ جمایا تو مِری دِید بڑھی
مجتہد کون ہوا؟ دِینِ محبت میں یہاں
پائے تحقیق اٹھانے سے بھی تقلید بڑھی
میری آنکھوں نے منوْر کیا دیواروں کو
جب ستاروں کی طرف مشعلِ خورشید بڑھی
میں نے آواز اٹھائی تو معاً میری طرف
لہریے لیتی ہوئی تیغِ صنادید بڑھی
ایک پوشاک پہ یوں رنگ بکھیرے میں نے
خود گلے مجھ کو لگانے کے لیے عید بڑھی
عصمت اللہ نیازی
No comments:
Post a Comment