مثالِ سنگ خیال آئینے میں آتا ہے
چٹخنے لگتا ہوں بال آئینے میں آتا ہے
یہ آسماں کہ جُھکا جا رہا ہے دل کی طرف
یہ آئینہ بھی سفال آئینے میں آتا ہے
کبھی چمکتا ہے اک آفتابِ سرشاری
کبھی غبارِ ملال آئینے میں آتا ہے
ہنر سے آتی ہیں آرائشیں محبت میں
سلیقہ ہو تو جمال آئینے میں آتا ہے
وہ رنگِ وحشتِ اسلوبِ شعر ہے میرا
غزل کہوں تو غزال آئینے میں آتا ہے
یہ پیاس ہے کہ سمندر کا عکس ہے شہزاد
جواب ہے کہ سوال آئینے میں آتا ہے
شہزاد اظہر
No comments:
Post a Comment