کسی نے مجھ سے کہا تو چمن میں رہتا ہے

 تلاش محبوب

کسی نے مجھ سے کہا تُو چمن میں رہتا ہے 

گُلوں کی مہکی ہوئی انجمن میں رہتا ہے 

مگر کسی بھی چمن میں تِرا نشاں نہ مِلا 

پتا چلا کہ ہے کنجِ صدف میں تیرا گھر 

مقیم رہتا ہے تو اس میں بن کے آبِ گُہر 

مگر کہیں بھی تِرا بحرِ‌ بیکراں نہ ملا 

تِری گلابیٔ شبنم میں جستجو کی ہے 

ہوا کے گیسوئے برہم میں جستجو کی ہے 

مگر کہیں بھی تِری زُلف کا دُھواں نہ ملا 

غزالِ رعنا سے میں نے کبھی تجھے پوچھا 

غبارِ صحرا سے میں نے کبھی تجھے پوچھا 

فضائے دشت میں بھی تیرا کارواں نہ ملا 

کبھی فلک کی گھٹا میں تجھے تلاش کیا 

کبھی شفق کی حِنا میں تجھے تلاش کیا 

کسی جگہ بھی مگر تیرا آستاں نہ ملا 

مجھے خبر ملی کاشانہ ہے تِرا مہتاب 

تُو چشمِ ماہ میں رہتا ہے بن کے رنگیں خواب 

تِرا سراغ مگر سُوئے کہکشاں نہ ملا 

تُو ہی بتا کہ تجھے میں کہاں تلاش کروں 

میں کس جگہ تجھے نُورِ رواں تلاش کروں 

جہاں جہاں میں گیا، تُو وہاں وہاں نہ ملا 

کوئی اُٹھا نہ سکا تیرے پردہ ہائے ناز 

زمین و چرخ پہ کوئی نہیں ہے محرمِ راز 

تجھے بتائے کوئی ایسا نکتہ داں نہ ملا 

سلام سندیلوی