میں اب بھی ڈھونڈتا رہتا ہوں ہے کہاں مری ماں

 میں اب بھی ڈھونڈتا رہتا ہوں ہے کہاں مِری ماں

پکار اٹھتا ہوں ہر غم میں اب بھی ماں، مری ماں

اسی کے دَم سے تھی جتنی بھی تھی توانائی

وه استخوان کی اک مُشتِ ناتواں مری ماں

پرندے لوٹتے ہیں شام کو تو سوچتا ہوں

وه دن بھی تھے کہ مِرا بھی تھا آشیاں، مری ماں

وہیں وہیں ہے مِرا دل، وہیں وہیں مری جاں

جہاں جہاں غمِ جاناں، جہاں جہاں مری ماں

ہر اک کرن میں ہے روشن اسی کا اشک کوئی

ہر ایک شمع میں گُھلتی ہے شمع ساں مری ماں

سُریلی کُونجوں سے اور شبنمی ستاروں سے

پُکارتی ہے مُسلسل کراں کراں مری ماں

انہی نقوشِ قدم میں ہے کہکشاں میری

مِری بہشت ہے، ہے میرا آسماں مری ماں

شجاعت علی راہی