خواہش وصل کو صورت وہ عطا کر دی ہے

خواہشِ وصل کو صورت وہ عطا کر دی ہے
ہجر پائندہ رہے ہم نے دُعا کر دی ہے
آئینہ خانے پہ چڑھ دوڑے ہو پتھر لے کر
آئینوں نے کہو کیا ایسی خطا کر دی ہے؟
خاک زادہ ہوں سو قسمت نے گواہی میری
ایک عالم میں مِری خاک اُڑا کر دی ہے
دشت لکھتا ہوں تو دریا ہی لکھا جاتا ہے
پیاس نے مجھ میں وہ ہلچل سی بپا کر دی ہے
فاصلہ دل کا تھا دہلیز سے دو چار قدم
میں نے رستے میں مگر عمر فنا کر دی ہے
رات کیا میں نے درِ خواب پہ دستک دے دی
ہائے آنکھوں نے مِری نیند قضا کر دی ہے
ماوراء ہونے لگا جسم کی حد سے اشرفؔ
جس نے اُس ذات میں گم اپنی اَنا کر دی ہے

اشرف نقوی