پریشاں رات ساری ہے ستارو تم تو سو جاؤ

فلمی گیت

پریشاں رات ساری ہے، ستارو تم تو سو جاؤ

سکوتِ مرگ طاری ہے، ستارو تم تو سو جاؤ 

ہنسو اور ہنستے ہنستے ڈوبتے جاؤ خلاؤں میں

ہمیں پر رات بھاری ہے، ستارو تم تو سو جاؤ

ہمیں تو آج کی شب پَو پَھٹے تک جاگنا ہو گا

یہی قسمت ہماری ہے، ستارو تم تو سو جاؤ

تمہیں کیا، آج بھی کوئی اگر مِلنے نہیں آیا

یہ بازی ہم نے ہاری ہے، ستارو تم تو سو جاؤ

کہے جاتے ہو رو رو کر ہمارا حال دُنیا سے

یہ کیسی رازداری ہے، ستارو تم تو سو جاؤ

ہمیں بھی نیند آ جائیگی ہم بھی سو ہی جائیں گے

ابھی کچھ بے قراری ہے، ستارو تم تو سو جاؤ

قتیل شفائی