چراغ سارے بجھا کر چلا گیا مجھ میں

چراغ سارے بجھا کر چلا گیا مُجھ میں

پھر اس کے بعد اجالا نہ ہو سکا مجھ میں

عجب اداس سی رت ہے کہ روز رات گئے

بنامِ عشق نکلتا ہے تعزیہ مجھ میں

نہیں نہیں میں کلیسا نہیں ہوں میرے خدا

اتر رہی ہے بھلا کیوں وہ راہبہ مجھ میں

ہوائے شام! مِرے اشک ہی نہیں رکتے

خطا معاف، پڑھا کر نہ مرثیہ مجھ میں

ابھی نہ جاؤ مجھے چھوڑ کر خدا کے لیے

ابھی نہیں ہے بچھڑنے کا حوصلہ مجھ میں

بچھڑ کے مجھ سے بڑی دیر زندگی سے لڑا

پھر ایک رات اچانک وہ مر گیا مجھ میں

میثم علی آغا