تو سمجھتا ہے کسی جھیل سے نکلا ہوا ہے

تُو سمجھتا ہے کسی جھیل سے نکلا ہوا ہے

آئینہ دشت کی تمثیل سے نکلا ہوا ہے

روشنی اِسمِ معلٰی ہے سو یہ اِسم کسی

آیتِ عشق کی تنزیل سے نکلا ہوا ہے

تُو سمجھتا ہے کہیں اور نہیں جانے کا

اور یہ دل تِری تحویل سے نکلا ہوا ہے

اے مِرے ہِجر گزیدہ! تیرے رتبے کی قسم

تُو وہ قصہ ہے جو انجیل سے نکلا ہوا ہے

یہ جو وحشت ہے اسے دل میں سنبھالا جائے

یہ دِیا وہ ہے جو تشکیل سے نکلا ہوا ہے

وحشتیں ایسے بھی صد معنی ہوا کرتی ہیں

پھر تِرا ہِجر تو تفصیل سے نکلا ہوا ہے

میثم علی آغا