خلوص دل سے جو تو ہم پہ مہرباں ہوتا

خلوصِ دل سے جو تُو ہم پہ مہرباں ہوتا

مجال تھی کہ مخالف یہ آسماں ہوتا

نصیب میں نہ اگر تیرا آستاں ہوتا

تو کیا خبر کہ ٹھکانا مِرا کہاں ہوتا

تمہارا قرب میسر جو میری جاں ہوتا

بہار ہوتی، چمن ہوتا، آشیاں ہوتا

حضورِ حسن تو حرف و صدا ہے گستاخی

بس ایک اشک بہت تھا، اگر رواں ہوتا

یہ سب تمہارے تغافل کا اک کرشمہ ہے

نہ تم بدلتے، نہ یوں میں ہی بدگماں ہوتا

تمہارے دَم سے ہے میرا وجود، میری نمود

تمہارا جلوہ نہ ہوتا تو میں کہاں ہوتا

نصیرؔ! ان کو سنانا تھی داستانِ الم

اگر نہ سلسلۂ شوق درمیاں ہوتا

سید نصیرالدین نصیر