جذب دل پر ناز تھا مجھ کو مرے کام آ گیا

جذبِ دل پر ناز تھا مجھ کو، مِرے کام آ گیا

دُور جو رہتا تھا مجھ سے، وہ سرِ شام آ گیا

حُسن برساتا ہوا جب وہ سرِ بام آ گیا

میرے لب پر دفعتاً اللہ کا نام آ گیا

چارہ گر بولا کہ بچنے کی کوئی اب کر سبیل

ہُوک سی دل میں اُٹھی، لب پر تِرا نام آ گیا

جو گزرنی تھی وہ گزری، غم نہیں دل کا ہمیں

کام آنا تھا محبت میں اِسے، کام آ گیا

التفاتِ خاص سے دیکھا جو ساقی نے کبھی

رِند یہ سمجھے، کہ گردش میں کوئی جام آ گیا

بے ٹھکانے ہو کے رہ جاتے غم و رنج و ملال

سچ تو یہ ہے، دل محبت میں بڑے کام آ گیا

لطف فرما جب نگاہِ پیر مئے خانہ ہوئی

خُم جُھکا، ساقی کُھلا، رِند آ گئے، جام آ گیا

باغباں مسرور، گلچیں شاد، خوش صیاد بھی

آج آخر کون گُلشن میں تہِ دام آ گیا

گِھر گئے کس واسطے غم کی گھٹاؤں میں نصیرؔ

کیا خیالِ گیسوئے جاناں سرِ شام آ گیا؟

سید نصیرالدین نصیر