فصیلِ غم میں دریچہ کوئی تو رہنے دو

فصیلِ غم میں دریچہ کوئی تو رہنے دو
خوشی کے واسطے رَستہ کوئی تو رہنے دو
مِرے نصیب کی ویران رہگزاروں میں
کِرن، خیال، اجالا کوئی تو رہنے دو
مہکتے خواب کہیں راستہ نہ کھو بیٹھیں
کنارِ چشم، دِیا سا کوئی تو رہنے دو
کوئی تو صبح تلک ہو امید کی صورت
کہ دشتِ شب میں ستارا کوئی تو رہنے دو
یہ کیا کہ وقت تمہاری ہی دسترس میں رہے
مِری گرفت میں لمحہ کوئی تو رہنے دو
نویدِ صبحِ طرب کون دینے آئے گا
کسی شجر پہ پرندہ کوئی تو رہنے دو

حامد یزدانی​