حرف نیرنگ سمجھ رنگ اساطیر میں آ
ہنرِ اذنِ کرامت مِری زنجیر میں آ
میں کہ خوابیدہ جزیروں کے تعاقب میں رہوں
تُو کہ اک بار کہیں موجۂ تعبیر میں آ
خواہشیں عشق کا اعجاز نہیں ہوتی ہیں
چوم کر ماتھا کسی زلفِ گِرہ گیر میں آ
دیکھا ان تازہ گلابوں کو نئی حیرت سے
گلشنِ جسم میں رہ، حلقۂ تصویر میں آ
وقف کر وقتِ ملاقات، ملاقات اندر
دشت کو دشت سمجھ خاکِ ہمہ گیر میں آ
عکس در عکس کوئی اور تماشائے جواز
شیشۂ دل سے نکل، حیرتِ دلگیر میں آ
مسندِ عشق پہ سلطانی نہیں ہو سکتی
عجز کے پاؤں پکڑ فقر کی جاگیر میں آ
روند کر روح کسی جسم کا احوال سمجھ
چھوڑ دے اصل خودی بحرِِ مزامیر میں آ
صفحۂ خواب سے اٹھوں میں سخن کی مانند
تُو کسی روز مِرے لفظ کی تعبیر میں آ
سید جاوید
No comments:
Post a Comment