آنکھ الجھی، سوچ ویراں آئینے کے سامنے
کر گیا وہ مجھ کو حیراں، آئینے کے سامنے
کر رہے تھے جب رفُو سب اپنا اپنا پیرہن
میں کھڑا تھا چاک داماں آئینے کے سامنے
رو برو مشکل ہوا اس کو بتانا حالِ دل
لگ رہا تھا کتنا آساں آئینے کے سامنے
ایک میں بے چہرگی اوڑھے ہوئے، بے ننگ و نام
ایک وہ آئینہ ساماں، آئینے کے سامنے
دیکھ کر مجھ سا ہی چہرہ، میرے جیسے خدوخال
ہو گیا وہ بھی پریشاں، آئینے کے سامنے
ہو گیا جو ایک لمحہ قید پسِ آئینہ
تھم گئی گردشِ دوراں آئینے کے سامنے
خار لپٹے پاؤں سے، سورج لیے سر پر کئی
وہ کھڑا تھا گُل بداماں، آئینے کے سامنے
دل کے شیشے میں تِرا جو عکس کب سے قید تھا
آ گیا بر نوکِ مژگاں، آئینے کے سامنے
آج یوں بکھرے صبا، جوں کرچیاں ہوں خواب کی
جو کئے تھے عہد و پیماں، آئینے کے سامنے
سبکتگین صبا
No comments:
Post a Comment