تو پھر یہ طے ہے کہ اب رابطہ نہیں ہو گا

 تو پھر یہ طے ہے کہ اب رابطہ نہیں ہو گا

تو پھر یہ جان لو کہ ہم نہ بھول پائیں گے

نہ بھول پائیں گے ہم سردیوں کی راتوں کو

اور ان میں کی ہوئی سب نرم گرم باتوں کو

کہی اور ان کہی باتیں تھیں اور فسانے تھے

ملن کی رُت میں بھی جو ہجر کے زمانے تھے

مگر جدائی میں گھڑیاں تھیں وصل کی کتنی

طویل ہو کے بھِی جو مختصر ہی ٹھہری تھیں

طویل یادیں ہیں ان مختصر سی گھڑِیوں کی

کہ جن میں حدت و شدت، حرارت و رنگت

انہی ادھورے حوالوں میں اک سیاہ چادر

خیال، خواب، گلے، شکوے اور میں اور تم

سنو وہ موسمِ دلدار لوٹ آیا ہے

مگر سیاہ چادر یہاں ندارد ہے

سیاہ پوش بھی گم اپنی دنیا میں ہیں کہیں

کہیں پہ چائے کی پیالی کی بھاپ میں گم سم

کہیں ہیں کافی کے بل کھاتے بادلوں میں گم

خیال و خواب کے امکان کی کہیں باتیں

کہیں ہے نان و نفقہ کی الجھنیں ہمراہ

جو ہجر بعدِ فنا بھی نہ ہم نے سوچا تھا

وہ آج چپکے سے ٹھنڈی ہوا کے ساتھ کہیں

مِری سیاہ چادر میں آ چھپا ہے ابھی

رابعہ درانی