لاگ ایسی کہ دکھائی نہیں دیتا کچھ بھی

 لاگ ایسی کہ دکھائی نہیں دیتا کچھ بھی

آگ ایسی کہ سجھائی نہیں دیتا کچھ بھی

ذہن و دل برسرِ پیکار رہا کرتے ہیں

شور اتنا ہے سنائی نہیں دیتا کچھ بھی

عشقِ منصور بھی لازم ہے اناالحق کے لیے

صرف دعوائے خدائی نہیں دیتا کچھ بھی

مانگنا ہے تو طلب کے سبھی آداب سمجھ 

صرف اک ذوقِ گدائی نہیں دیتا کچھ بھی

کس لیے وصل کی، تزئین تمنا کیجے

"قرب جُز داغِ جُدائی نہیں دیتا کچھ بھی"

تزئین راز