قفس رنگ سے نکلے تو کدھر جائیں گے

 قفسِ رنگ سے نکلے تو کدھر جائیں گے

ہم پریشانِ نظر اور بکھر جائیں گے

شعلۂ وقت سے ہر شمع کو ملتی ہے چمک

محفلِ دل کے مقدر بھی سنور جائیں گے

کہیں ملتا ہی نہیں بحرِ جنوں کا ساحل

صورتِ موجِ بلا خیز گزر جائیں گے

وحشتیں خاک بسر دل کے بیابانوں میں

آج کچھ اپنی سی دیوانے بھی کر جائیں گے

آبلہ پائی کوئی پاؤں کی زنجیر نہیں

وادئ خار میں بے خوف اتر جائیں گے

ظلمتِ خواب میں بھٹکے ہوئے راہی آخر

منزلِ نور کے سینے میں اتر جائیں گے

چھیڑ کر دیکھ کبھی سازِ تمنائے بہار

دامنِ گوش گلِ نغمہ سے بھر جائیں گے

بے حجاب آئے جو ہم دشت میں چاند اترے گا

خلوتِ یار کے آئینے نکھر جائیں گے

سینۂ سنگ کی بے نور فضاؤں میں غزل

مشعلِ شوق سے ہم لے کے شرر جائیں گے

سارا غزل