دوست سفاک ہیں مرنے نہیں دیتے مجھ کو

دوست سفاک ہیں مرنے نہیں دیتے مجھ کو
میں کہ اک زخم ہوں بھرنے نہیں دیتے مجھ کو
جانے کیا جرم ہُوا ہے کہ مِرے شہر کے لوگ
اس کی گلیوں سے گزرنے نہیں دیتے مجھ کو
میں اگر ڈوبنا چاہوں تو بچا لیتے ہیں لوگ
اور ابھروں تو ابھرنے نہیں دیتے مجھ کو
سر پہ جلتا ہوا سورج ہے، مگر یہ اشجار
اپنے سائے میں ٹھہرنے نہیں دیتے مجھ کو
میں تھکا ہارا پرندہ ہوں خلا میں کب سے
اس بلندی سے اترنے نہیں دیتے مجھ کو

امیر قزلباش