Sunday 14 February 2016

جس طرف دیکھئے ہنگامہ بپا لگتا ہے

جس طرف دیکھیے ہنگامہ بپا لگتا ہے
اب تو کچھ کہنا بھی صحرا کی صدا لگتا ہے
کوئی انصاف نہیں، کوئی سماعت بھی نہیں
اس عدالت میں تو جانا بھی خطا لگتا ہے
کیوں نہ وہ خود ہی ذرا جائزہ لے لیں اپنا
میں اگر کچھ بھی کہوں ان کو برا لگتا ہے
ان کے ہاتھوں سے تو میں زہر بھی پی لیتا ہوں
در حقیقت وہ مجھے آبِ بقا لگتا ہے
کھوٹ مجھ میں ہی سہی مان لیا ہے لیکن
کیا کوئی آپ کو دنیا میں کھرا لگتا ہے
یہ جو لغزیدہ نظر آتا ہے چلتے چلتے
دوستو! یہ تو مجھے آبلہ پا لگتا ہے
یاسؔ کے بارے میں پوچھا جو کسی نے آ کر
کہہ دیا میں نے بھی 'پابندِ وفا' لگتا ہے

یاس چاند پوری

No comments:

Post a Comment