جسموں کے پگھلنے کا مہینا نہیں آیا​

جسموں کے پگھلنے کا مہینا نہیں آیا​

بھاگے ہیں بہت، پھر بھی پسینا نہیں آیا​

طوفانِ بلا خیز میں رہتے ہیں ہمیشہ​

ساحل پہ کبھی اپنا سفینا نہیں آیا​ 

حق بات پہ کیا زہر کا وہ جام پئیں گے​

اک ساغرِ مے بھی جنہیں پینا نہیں آیا​

نکلتے ہیں فقط سنگ تہِ سنگ زمیں سے​

ہاتھوں میں کسی کے بھی خزینا نہیں آیا​

تلوار لیے لرزہ بر اندام ہے قاتل​

مقتول کے ماتھے پہ پسینا نہیں آیا​

سانسوں کا تسلسل بھی ہے مجبورئ ہستی​

جیتے ہیں، کہ مرنے کا قرینا نہیں آیا​

جس شہر میں اک عمر سے ہم رہتے ہیں باقی​ؔ

اس شہر میں اب تک ہمیں جینا نہیں آیا​

باقی احمد پوری