اداس بام ہے در کاٹنے کو آتا ہے​

اداس بام ہے، در کاٹنے کو آتا ہے​

تِرے بغیر یہ گھر کاٹنے کو آتا ہے​

خیالِ موسمِ گل بھی نہیں ستمگر کو​

بہار میں بھی شجر کاٹنے کو آتا ہے​

فقیہِ شہر سے انصاف کون مانگے گا​

فقیہِ شہر تو سر کاٹنے کو آتا ہے​

اسی لیے تو کسانوں نے کھیت چھوڑ دیئے​

کہ کوئی اور ثمر کاٹنے کو آتا ہے​

تِرے خیال کا آہو کہیں بھی دن میں رہے​

مگر وہ رات اِدھر کاٹنے کو آتا ہے​

کہا تو تھا کہ ہمیں اس قدر بھی ڈھیل نہ دے​

اب اڑ رہے ہیں تو پر کاٹنے کو آتا ہے​

یہ کام کرتے تھے پہلے سگانِ آوارہ​

بشر کو آج بشر کاٹنے کو آتا ہے​

یہ اس کی راہ نہیں ہے مگر یونہی باقی​ؔ

وہ میرے ساتھ سفر کاٹنے کو آتا ہے​

باقی احمد پوری