نگاہ ناز تیری فتنہ سامانی نہیں جاتی

نگاہِ ناز! تیری فتنہ سامانی نہیں جاتی

کبھی جو دل ٹھہرتا ہے تو حیرانی نہیں جاتی

نظر اس حسنِ تاباں تک بآسانی نہیں جاتی

مگر جا کر پلٹتی ہے تو پہچانی نہیں جاتی

ہوئی مدت کہ اس نے ناز سے دامن کو جھٹکا تھا

ابھی تک موجۂ گل کی پریشانی نہیں جاتی

کہاں تک نام بدلے جائیں پھولوں میں ستاروں میں

کرشموں کی تِرے یوں بھی فراوانی نہیں جاتی

یہاں تک تو خرابِ لذتِ گفتارِ ساقی ہوں

کہ خود مجھ سے بھی اپنی بات پہچانی نہیں جاتی

مِری حسرت نہ پوچھو، شمعِ سوزاں کی طرف دیکھو

کہ ہے بے آشیاں، لیکن پُر افشانی نہیں جاتی

تعالی اللہ باوصفِ ہزاراں رندی و مستی

خیالِ یار! تیری پاکدامانی نہیں جاتی

جو بستر ہو تو اس در پر، جو تکیہ ہو تو اس در کا

نہیں جاتی اثرؔ فکرِ تن آسانی نہیں جاتی

اثر لکھنوی