ترے لیے بھی رعایت تو ہو نہیں سکتی

تِرے لیے بھی رعایت تو ہو نہیں سکتی

کہ اب دوبارہ محبت تو ہو نہیں سکتی

یہاں سنا ہے ہواؤں کی حکمرانی ہے

یہاں چراغوں کی عزت تو ہو نہیں سکتی

ذرا سی تلخ کلامی سے ہم نہ بدلیں گے

پرانی شے کی مرمت تو ہو نہیں سکتی

تمہارے عشق میں رگ رگ یہ کاٹ ڈالی ہے

اب اس سے بڑھ کے اذیت تو ہو نہیں سکتی

جو چاہتا تھا وہ خود کو بنا نہیں پایا

سو دوسروں کو نصیحت تو ہو نہیں سکتی

اگر ہے عشق تو صحرا میں آپ آ جائیں

حضور شہر میں وحشت تو ہو نہیں سکتی

بس ایک راہ بچی ہے کہ تم پہ مر جائیں

کہ دوسری کوئی صورت تو ہو نہیں سکتی

تجھے بھی ہم سے محبت ہے، برملا کہہ دو

کہ یارایسے مروت تو ہو نہیں سکتی

ہم اپنی آنکھوں کی کھاتے نہیں قسم، لیکن

ہمارے لب پہ شکایت تو ہو نہیں سکتی

کچھ اس لیے بھی وفا تجھ سے چاہتے نہیں ہیں

ہمارے جذبوں کی قیمت تو ہو نہیں سکتی

وہ جان بوجھ کے کرتے ہیں اب اداکاری

کہ بھول جانے کی عادت تو ہو نہیں سکتی

سمجھ سکو تو سمجھ لو ہماری آنکھوں کو

اب اور ہم سے وضاحت تو ہو نہیں سکتی

تمہارے عشق میں دنیا کو کر لیا دشمن

سو اب کسی سے شکایت تو ہو نہیں سکتی

نہ جانے غیب سے آئے گا کب خیال کوئی

غزل کے ہونے میں عجلت تو ہو نہیں سکتی

حدیثِ درد سناؤ نہ پتھروں کو زبیرؔ

کہ آئینوں سے رعایت تو ہو نہیں سکتی

زبیر قیصر