سجدہ کر کے قدم یار پہ قرباں ہونا​

سجدہ کر کے قدمِ یار پہ قرباں ہونا​

یوں لکھا تھا مِری قسمت میں مسلماں ہونا ​

جس کا مذہب ہو فقط یادِ صنم دیدِ صنم​

وہ نہیں جانتا کافر یا مسلماں ہونا ​

حُسن کو پُوجنا اور جامِ محبت پینا​

مشربِ عشق میں یوں صاحبِ ایماں ہونا ​

ہاں رہے پیشِ نظر یار کی صورت ہر دم

ہم تو سمجھیں ہیں اسے کاملِ ایماں ہونا

میں نہ ہوتا تو خدائی کا بھرم کھل جاتا

تیری ہستی کا پتا ہے میرا انساں ہونا

مکتبِ عشق میں وامقؔ نے یہ پائی تعلیم​

عین ایماں ہے فدائے رخِ جاناں ہونا ​

​

وامق جونپوری