ہر ایک راستہ ویراں ہو گر تو کیا کیجئے

ہر ایک راستہ ویراں ہو گر تو کیا کیجئے

امید سر بہ گریباں ہو گر تو کیا کیجئے

ہزار بار کریں لوگ عہدِ ترکِ وفا

قریب کوچۂ جاناں ہو گر تو کیا کیجئے

جو کھل کے روئیں تو دامن بھی اور دوست بھی ہیں

گھٹا گھٹا کوئی طوفاں ہو گر تو کیا کیجئے

غریبِ شہر ہو کوئی تو زہر ہی پی لے

خود اپنے شہر میں مہماں ہو گر تو کیا کیجئے

امیدِ چارہ گری جس سے تھی ہمیں راہیؔ

اسی کی زلف پریشاں ہو گر تو کیا کیجئے

راہی معصوم رضا