اک مے بے نام جو اس دل کے پیمانے میں ہے​

اک مۓ بے نام، جو اس دل کے پیمانے میں ہے​

وہ کسی شیشے میں ہے ساقی، نہ میخانے میں ہے​

پوچھنا کیا، کتنی وسعت میرے پیمانے میں ہے ​

سب الٹ دے ساقیا! جتنی بھی میخانے میں ہے​

یوں تو ساقی، ہر طرح کی، تیرے میخانے میں ہے ​

وہ بھی تھوڑی سی، جو ان آنکھوں کے پیمانے میں ہے​

ایک ایسا راز بھی دل کے نہاں خانے میں ہے ​

لطف جس کا کچھ سمجھنے میں نہ سمجھانے میں ہے​

یاد ایامے، کہ جب تھا ہرنفس اک زندگی

زندگی اب ہر نفس کے ساتھ مر جانے میں ہے​

ایک کیفِ نا تمام درد کی لذت ہی کیا؟​

درد کی لذت سراپا درد بن جانے میں ہے​

غرق کر دے تجھ کو زاہد! تیری دنیا کو خراب 

کم سے کم اتنی تو ہر میکش کے پیمانے میں ہے​

پھر نقاب اس نے الٹ کر روحِ تازہ پھونک دی ​

اب نہ کعبے میں ہے سناٹا نہ بت خانے میں ہے​

منتشر کر دے اسے بھی حسنِ بے پایاں کے ساتھ​

زندگی شیرازۂ دل کے بکھر جانے میں ہے​

پی بھی جا زاہد! خدا کا نام لے کر پی بھی جا ​

بادۂ کوثرکی بھی اک موج پیمانے میں ہے ​

شیشہ مست و بادہ مست و حسن مست و عشق مست ​

آج پینے کا مزہ، پی کر بہک جانے میں ہے​

بے تحاشا پی رہے ہیں کب سے رِندانِ الست​

آج بھی اتنی ہی مے ہر دل کے پیمانے میں ہے​

حسن کی اک اک ادا پر جان و دِل صدقے، مگر ​

لطف کچھ دامن بچا کر ہی گزر جانے میں ہے ​

جگر مراد آبادی​