چارہ گر مشورۂ ترک وفا دیتے ہیں

چارہ گر مشورۂ ترکِ وفا دیتے ہیں

زہر دیتے ہیں یہ ظالم کہ دوا دیتے ہیں

مجھ کو یہ خوف کہ تم بھی کہیں ان میں سے نہ ہو

چاہنے والے کو جو لوگ دغا دیتے ہیں

کان تک اس کے نہ پہنچے تو نہ پہنچے فریاد

سننے والوں کا کلیجا تو پکا دیتے ہیں

الحذر شیخ! برے ہوتے ہیں پینے والے

اچھے اچھوں کو یہ دھوکے سے پلا دیتے ہیں

تنگئ عیش میں ممکن نہیں ترکِ لذت

سوکھے ٹکڑے بھی تو فاقوں میں مزا دیتے ہیں

یادِ ایام جوانی ہے بہت درد انگیز

وہی اچھے جو افسانے بھلا دیتے ہیں

جب غزل کوئی نئی کہتے ہیں مرزؔا صاحب

کسی حیلے سے انہیں جا کے سنا دیتے ہیں

مرزا ہادی رسوا