دل فرط مسرت سے مرا جھوم اٹھا ہے

دل فرطِ مسرت سے مِرا جھوم اٹھا ہے

اب عالمِ تنہائی کا ہم راز ملا ہے

تہذیب و تمدن کی بہاروں کو جلا ہے

شوریدہ زمیں پر بھی جہاں پھول کھلا ہے

ہم کو یہ سبق روزِ ازل سے ہی ملا ہے

اک ذاتِ خدا، باقی ہر اک چیز فنا ہے

دل ہے کہ ہر اک لمحہ مِرا ٹوٹ رہا ہے

تھا ناز بہت جس پہ وہی آج خفا ہے

انگشت نمائی مِرے کردار پہ کر کے

دشمن مِرا ہر گام پشیمان ہوا ہے

نادان یہاں آتے ہی بن جاتے ہیں دانا

اس محفل خوشرنگ کی تہذیب جدا ہے

دل میں بھی ہے موجود رگِ جاں سے بھی نزدیک

جس سمت نظر ڈالئے وہ جلوہ نما ہے

اک جرمِ محبت کو بھی بخشا نہ جہاں نے

رسوا سرِ بازار مجھے خوب کیا ہے

افشاں نہ کبھی ہوتا مِرا رازِ محبت

اک تیرے تبسم کا ہی افسانہ بنا ہے

اﷲ بچائے نظرِ بد سے ہمیشہ

ہاتھوں پہ تِرے رنگِ حنا خوب چڑھا ہے

ساحل پہ کھڑا رہ کے بھی پانی سے رہا دور

ہے کون، لبِ دریا جو پیاسا ہی مرا ہے

کیا رکھا ہے بیکار کی باتوں میں اے عابدؔ

’’کہہ دو یہ ہوا کچھ نہیں دو دن کی ہوا ہے‘‘

عابد حسین عابد