وہ نفع چھوڑ کے آخر زیاں تک آ گیا تھا

ہمارا ذکر "کسی" کی زباں تک آ گیا تھا

وہ نفع چھوڑ کے آخر زیاں تک آ گیا تھا

دعا کے ساتھ میں اشکوں کے ہار بھیجتا تھا

کہ صبر ٹوٹ کے آہ و فغاں تک آ گیا تھا

ہمارے دل سے "پری زاد" پیٹتے نکلے

کہ وہ جو اصل مکیں تھا مکاں تک آ گیا تھا

ہمارے پاس سہولت تھی غم نچوڑنے کی

سو زخم سوکھ کے جلدی نشاں تک آ گیا تھا

تِرا "یزید" کہاں تھا؟، خدا بچانے میں

مِرا "حسین" تو نوکِ سناں تک آ گیا تھا

اب اس سے بڑھ کر اسے اور کیا خسارا ہو

یقین ٹوٹ کے واپس گماں تک آ گیا تھا

حسیب الحسن