یہ ضرور آتش آرزو کا وبال ہے

یہ ضرور آتشِ آرزو کا وبال ہے

جسے تُو رِہائی کہے دِلا! وہ تو جال ہے

مِرا گھاؤ صدقۂ شوق تھا، سو ہرا رہا

یہ کسک نوازشِ یار تھی، سو بحال ہے

تُو ہجومِ رنگ و سخن میں ہے، پہ ملول ہے

مجھے راس راحتِ رنج و لطفِ ملال ہے

مِری کُل ریاضتِ عشق خام سی خام تھی

تِرا کم نگاہی سے دیکھنا بھی کمال ہے

جنہیں ڈس لیا ہو خِرد نے، ان سے گِلہ بھی کیا

مگر اہلِ عشق! مِرا تو تم سے سوال ہے

جو مِری رگوں میں اُگی تھی شاخِ طلب، اسے

تِری بے دلی سے نمو ملی، سو نِہال ہے

مِرے گِرد گَرد و غبار اڑتا ہے چار سُو

مِرے خوبرو! تُو جمال تھا، تُو جمال ہے

سیماب ظفر