جب تِرے شہر میں صحرا سے ہوا آئے گی
مِری بابت تِرے لوگوں کو بتا آئے گی
جن کتابوں کو میں املاک سمجھ بیٹھا ہوں
میری اولاد وہ دریا میں بہا آئے گی
سانس لیتے ہوئے لاشے سے ملاقات تو کر
دل کی دھک دھک سے بھی ہچکی کی صدا آئے گی
ایک مجذوب نے انگلی کے اشارے سے کہا
آسماں رویا تو پھر بادِ صبا آئے گی
تُو بصد شوق مِرے جسم کو چھلنی کر دے
پھر بھی ہونٹوں پہ تِرے حق میں دعا آئے گی
یہ خموشی مِری پہچان بنی پِھرتی ہے
کیا مجھے راس کبھی میرے خدا آئے گی
پہلے جی بھر کے تماشہ مجھے بننا ہو گا
تب کہیں جا کے مِری سمت قضا آئے گی
غمزدہ باپ کی دستار کی خاطر بیٹی
قبر کھودے گی، محبت کو دبا آئے گی
مجھ کو ہر شکل میں سورج کو بجھانا ہو گا
ورنہ چہروں کی کدورت سے حیا آئے گی
میں نے بپھری ہوئی آندھی کے ہیں تیور دیکھے
پیڑ جتنے بھی ہیں رستے میں گِرا آئے گی
پہلے دنیا تِرے افکار کو پوجے گی یہاں
پھر وہ دیوار سے تجھ کو بھی لگا آئے گی
مرنے والوں کو وہ خوش بخت کہے گا دانش
جس کے حصے میں بھی جینے کی سزا آئے گی
دانش عزیز
No comments:
Post a Comment