حریف آئے تو اس کا بھی گھر نکالا جائے

حریف آئے تو اس کا بھی گھر نکالا جائے

شکارگاہ سے اب کے نہ سر نکالا جائے

شکستِ فاش کا طوفان سر پہ آ پہنچا

بِساط کا ہے تقاضا کہ گھر نکالا جائے

زبان وقت کو دی جائے اک نئی لذت

زمین سے ثمر بے شجر نکالا جائے

تہی ہے دامنِ ابرِ عطا تو یوں کر لیں

خذف نچوڑ کے آبِ گُہر نکالا جائے

بہت عجیب ہے اس کی یہ شرط ہمسفری

میانِ راہ نہ رختِ سفر نکالا جائے

قلم کی پیاس بُجھانی بہت ضروری ہے

کسی پہ خنجرِ زہرابِ اثر نکالا جائے

بہت دنوں سے جلایا نہیں گیا ہے چراغ

یہ قرض ہے تو ہر اک بام پر نکالا جائے

نہ جانے کب سے شرر آشنا ہے دشتِ جمال

چلو کہ حوصلۂ چشمِ تر نکالا جائے 

چلایا جائے دل سنگ پر جو تیشۂ فن 

کوئی سپاس گزارِ ہُنر نکالا جائے 

یہ دور وہ ہے کہ یاور زبان ہی نہ رہے 

جو ایک حرف سرِ رہگزر نکالا جائے

یاور وارثی