آنکھ کو سُرمے کی دھاروں نے یوں تیکھا کر دیا
اک نظر بھی جس کو تاکا اس کو کُشتہ کر دیا
آرزو کو کچھ دنوں تک تو سنبھالے ہم رہے
ایک دن پھر تنگ آ کر اس کو چلتا کر دیا
یار! پیارے تم پہ ہم کو تو بھروسا اتنا تھا
ہم کو حیرت ہو رہی ہے تم نے ایسا کر دیا
اک زمانے تک یہ دنیا عشق سے خائف رہی
چلتے چلتے ہم نے آخر اس کو رستہ کر دیا
شہریاروں نے حکومت کے لیے اس شہر میں
"امن کی طاقت کو کُچلا، سچ کو رُسوا کر دیا"
تیرے چہرے کی صباحت سے کسے انکار ہے
جس طرف بھی تُو نے دیکھا اک اُجالا کر دیا
ہم اسیرِ بدگمانی کچھ تو آزر پہلے تھے
رفتہ رفتہ دل نے بالکل ہم کو تنہا کر دیا
آزر جمال
No comments:
Post a Comment