ہر اک شجر قصیدہ تھا ہر اک کھجور نعت

عارفانہ کلام نعت سرور کائناتﷺ

کلام بر سفرِ معراجِ نبویﷺ و شبِ برأت

ہر اک شجر قصیدہ تھا ہر اک کھجُور نعت

صحرا کو کر گیا شبِ اسریٰ کا نُور نعت

احمدؐ، حمیدؐ، حامدؐ و محمودﷺ کی قسم

عین السطُور حمد ہے بین السطُور نعت

انجیل تیسری ہے، تو قرآن آخری

تورات پہلی نعت تھی دُوجی زبُور نعت

پیہم نبیﷺ و آلِؑ نبیﷺ کی ثنا لکھی

ہم نے ہر ایک شرک سے رکھی ہے دُور نعت

راقم ہے آیتوں کا، تو قاری درود کا

قرآن لکھنے والے خدا کا غرُور نعت

قرآں کا لفظ لفظ مُصدِّق کہے جسے

ہم اہلِ عشق لکھتے ہیں وہ باشعُور نعت

اکبر اس ایک نعت پہ سارا سخن نثار

ہو پیش گر حضُورِ زمنؐ کے حضُور نعت

حسنین اکبر