سامانِ روشنی شبِ ہجراں نہ ہو سکے
پلکوں پہ یہ چراغ فروزاں نہ ہو سکے
اب کے بھی سوگوار رہا موسمِ بہار
شاخوں پہ پھول اب کے بھی خنداں نہ ہو سکے
کرتے رہے جو چاند ستاروں سے گفتگو
وہ آشنائے عظمتِ انساں نہ ہو سکے
ہر سمت چاندنی ہمیں مِلتی خلوص کی
پورے محبتوں کے یہ ارماں نہ ہو سکے
نقدِ نظر لُٹاتے رہے اہلِ دل، مگر
انساں کی آبرو کے نگہباں نہ ہو سکے
نجمہ نوائے شوق ہے بے کیف، بے اثر
گر نغمہ ریز تارِ رگِ جاں نہ ہو سکے
نجمہ انصار
No comments:
Post a Comment