رہتے ہیں کہیں اور مکاں اور کہیں ہے

 رہتے ہیں کہیں اور مکاں اور کہیں ہے

ہم مست الستوں کا جہاں اور کہیں ہے

ہم لوگ بہت دُور تلک بکھرے ہوئے ہیں

دل اپنا کہیں اور ہے جاں اور کہیں ہے

اس بار تو دشمن بھی اناڑی ہے بلا کا

ہے زخم کہیں اور نشاں اور کہیں ہے

ہم اس لیے بھی شہر سے باہر نہیں جاتے

جو لطف یہاں پر ہے کہاں اور کہیں ہے

مطلب کہ غلط سمت مِرا سارا سفر تھا

رکھا تھا کہیں پاؤں نشاں اور کہیں ہے

یاروں نے لگائی ہے بہت سوچ سمجھ کر

ہے آگ کہیں اور دھواں اور کہیں ہے

اختر ملک