سچ کے اظہار کو تہمت نہیں ہونے دیں گے

 سچ کے اظہار کو تہمت نہیں ہونے دیں گے

ایسا ہرگز کسی صورت نہیں ہونے دیں گے

رنگ تیرے مِری رنگت سے اترتے جائیں

ہم کبھی دشت کو وحشت نہیں ہونے دیں گے

گُل کھِلے کتنے ذرا دیکھ سرِ دشتِ وفا

تم تو کہتے تھے محبت نہیں ہونے دیں گے

یہ ستارے جو چمکتے ہیں لہو سے روشن

شبِ تاریک کو ظلمت نہیں ہونے دیں گے

اپنی چاہت کا صِلہ کُوئے ملامت تو نہیں

اتنی سستی تِری قیمت نہیں ہونے دیں گے

فکرِ فردا بھی ضروری مگر اچھے لوگو

ہم محبت میں سیاست نہیں ہونے دیں گے

اپنی جنت تو کہیں حرف کی حُرمت ہو گی

زندگی تیری حقارت نہیں ہونے دیں گے

دوست جو زخم لگاتے ہیں خلوصِ دل سے

وہ مدارات میں قِلت نہیں ہونے دیں گے

دل میں بستے ہیں سبھی دوست کہ دل کے دشمن

دل کو غم سے کبھی فرصت نہیں ہونے دیں گے

وہ بغاوت کے تصادم ہوں کہ چاہت کے چلن

حادثے زیست کو عشرت نہیں ہونے دیں گے

وہ ستارے جنہیں اسرارِ سفر ہو عامر

اپنی منزل کو مسافت نہیں ہونے دیں گے

عامر یوسف