شہر غم دنیا سے گزرتے ہوئے کچھ خواب

 شہرِ غمِ دنیا سے گزرتے ہوئے کچھ خواب

اترے ہیں مِری آنکھ میں ڈرتے ہوئے کچھ خواب

میں آج بھی تعبیر کے دریا میں کھڑا ہوں

وہ سونپ گیا تھا مجھے مرتے ہوئے کچھ خواب

دیکھا ہے کئی ماؤں کو دنیا کی نظر نے

اِس شہر کے فٹ پاتھ پہ دھرتے ہوئے کچھ خواب

چھوٹی سی تو دنیا ہے مِرے عشق و جنوں کی

میں، تُو، تِری یاد اور بکھرتے ہوئے کچھ خواب

کچھ یوں بھی میں اب آئینہ گھر میں نہیں رکھتا

میں نے کبھی دیکھے تھے سنورتے ہوئے کچھ خواب

شام اُن کو سُلا دیتی ہے تاروں کی لحد میں

لے آتا ہے سُورج جو اُبھرتے ہوئے کچھ خواب

بستے ہیں مِرے درد کے صحرا میں بھی صائم

کھِلتے ہوئے کچھ پھول، نکھرتے ہوئے کچھ خواب

عبدالباسط صائم