یہ تماشے ہیں ترے جگ کو دکھانے والے

 یہ تماشے ہیں تِرے جگ کو دکھانے والے

ہم تِری جادو گری میں نہیں آنے والے

اتنا دھوکا ہے وہاں جھوٹ کا بازار ہے گرم

خیر ہم بھی ہیں یہاں سچ کو چھپانے والے

💓دلربا! چھیڑ ذرا سازِ محبت اپنا

ہم ہیں دنیا کو نئے راگ سنانے والے

چند لمحوں کی عنایت تھی سماعت مجھ کو

یہی لمحے تھے گلے شکوے مٹانے والے

دھوپ اور تیز ہواؤں نے گواہی دی ہے

پیڑ پر اب کے ثمر ہیں نہیں آنے والے

جائیے، اپنی محبت بھی یہ لیتے جائیے

ہم کو مل جائیں گے اور ناز اُٹھانے والے

جہاں اپنوں نے کوئی روگ لگایا ہو وہاں

غیر سے کوئی دلاسے نہیں آنے والے

اب کے دیوالی پہ کچھ ایسی ہوا تیز ہوئی

بُجھ گئے سارے دِیے گھر کو سجانے والے

دل تک آیا ہے زمانے کی وہ راہ سے سیما

جب کے انداز نہ تھے اس کے زمانے والے

عشرت معین سیما