ہم ہجر کو رِستا دیکھ چکے
ہم وصل کا چہرہ دیکھ چکے
ہم عمر کی کچی سیما پر
سب سچا جھوٹا دیکھ چکے
ہم خواب نگر کے باسی تھے
تعبیر کا رستہ دیکھ چکے
ہے زہر سا تیکھا زہریلا
ہم وقت کا لہجہ دیکھ چکے
نہ کرشن ملا نہ سکھ پایا
ہم بن کر رادھا دیکھ چکے
اب آگے دنیا کیا دیکھوں
جب تجھ سا اچھا دیکھ چکے
تم بات کرے ہو چہرے کی
ہم دل بھی کالا دیکھ چکے
کیا موت انہیں تڑپائے گی
جو عشق کا سایہ دیکھ چکے
رب ڈھونڈنے نکلے تھے اور پھر
ہم خود میں کعبہ دیکھ چکے
ہم اس سے مل کر کے زویا
چھ ماہ میں دنیا دیکھ چکے
زویا شیخ
No comments:
Post a Comment