اس طور سر عام تماشا نہیں کرتے

 اس طور سرِ عام تماشا نہیں کرتے

تم روز بدل جاتے ہو اچھا نہیں کرتے

رُسوائی کے اسباب مہیا نہیں کرتے

یہ سوچ کے ہم پیار کا چرچا نہیں کرتے

سُوکھے ہوئے پھولوں کو کتابوں سے نکالو

بیتے ہوئے لمحات کا پیچھا نہیں کرتے

کرتے ہیں یہ کوشش کہ ہمیشہ رہیں ہم دم

جینے کی تِرے بعد تمنا نہیں کرتے

تتلی کی محبت نے مِرے باندھ دیے ہاتھ

اب شاخ سے پھولوں کو یہ توڑا نہیں کرتے

اسبابِ غزل کے لیے کچھ زخم ہرے ہوں

چاہت میں ملے درد بھلایا نہیں کرتے

‌ پتھر نہ بنا دے یہ طلسمات کی وادی

الفت میں پلٹ کر کبھی دیکھا نہیں کرتے

رکھ دیتی ہوں گلدان میں کاغذ کے بنے پھول

شوبھا تو بڑھا دیتے ہیں مہکا نہیں کرتے

‌ آسیب زدہ ہوتا ہے الماس! شجر جو

اس پر تو پرندے بھی بسیرا نہیں کرتے

الماس کبیر جاوید