تمہاری یاد کو یکسر بھلانے والا تھا

تمہاری یاد کو یکسر بھلانے والا تھا

میں اپنے آپ کو سُولی چڑھانے والا تھا

میں سانس سانس میں محسوس کر رہا تھا جسے

وہ شخص مجھ سے کہاں دور جانے والا تھا

میں مانتا ہوں کہ بخشی ہیں دھڑکنیں اس نے

مگر دلوں پہ ستم کون ڈھانے والا تھا؟

تِرے طفیل ہی منزل کو پا لیا میں نے

وگرنہ راستہ میں بھول جانے والا تھا

مکانِ دل پہ ہیں تالے لگا دئیے میں نے

تمہارے بعد یہاں کون آنے والا تھا

میں اس لیے بھی اے شہزاد چپ ہوا اس دم

وہ میری بات پہ آنسو بہانے والا تھا

شہزاد جاوید