مرحلہ دِید کا تکرار تک آ پہنچا ہے
طُور سے چل کے جنوں دار تک آ پہنچا ہے
بات آ پہنچی ہے اندیشۂ رُسوائی تک
جذبۂ دل، لبِ اظہار تک آ پہنچا ہے
نام کو بھی نہیں اب دل میں کدورت کا نشاں
آئینہ عکسِ رُخِ یار تک آ پہنچا ہے
شعلۂ عشق جو روشن ہے مِرے سینے میں
رنگ بن کر تِرے رُخسار تک آ پہنچا ہے
حُسنِ مستور اِسے اپنی تجلّی سے نواز
ایک سایہ تِری دیوار تک آ پہنچا ہے
اب کسے منزل جاناں پہ رسائی کا خیال
ہر قدم، کوششِ بے کار تک آ پہنچا ہے
شمع نے لے لیا آغوش میں پروانے کو
جب یہ سمجھی مِرے معیار تک آ پہنچا ہے
مطمئن قبر کی آغوش میں ایسے ہے طفیل
راه رَو جیسے درِ یار تک آ پہنچا ہے
طفیل ہوشیار پوری
No comments:
Post a Comment