اِک نظر دیکھ تو لیتے ہمیں جاتے جاتے
نفرتوں کی کوئی دیوار گِراتے جاتے
اِتنا تو کرتے کہ کچھ ہم میں تعلق رہتا
دیتے تہمت، کوئی الزام لگاتے جاتے
تم نے دن رات سُلگنے کی سزا دی تھی مجھے
اُنگلیاں راکھ میں اپنی بھی جلاتے جاتے
کوئی دو بول تو ہوتے میری اُلفت کے نام
چُبھتے لفظوں ہی سے بُنیاد اُٹھاتے جاتے
چھوڑتے ہلکی سی اِک درذ تو چلمن کے بیچ
مَیں تکا کرتا تمہیں اُس طرف آتے جاتے
گھول دیتے مِری سانسوں میں محبت کا نشہ
بس شرابوں کو شرابوں میں مِلاتے جاتے
چُوم کر ہاتھوں کو آنکھوں سے لگایا ہوتا
رسمِ دُنیا تھی تو یہ رسم نبھاتے جاتے
محمد عارف
No comments:
Post a Comment