جلوۂ روئے نبی مطلع انوار حیات

 عارفانہ کلام حمد نعت منقبت

جلوۂ رُوئے نبیؐ مطلعِ انوارِ حیات

جُنبشِ غنچۂ لب، خُطبۂ کردارِ حیات

تِریﷺ تخلیق کو مانا گیا شہکارِ حیات

نُور تیراﷺ ہی رہا طُرّۂ دستارِ حیات

یہ شرف کم ہے کہ شامل ہیں تِری اُمت میں

ورنہ ہم جیسے سِیہ کار، سزا وارِ حیات

تِرےؐ ہی نُور سے روشن ہوئے افلاک و زمیں

رونما ہو گئے ہر گوشے میں آثارِ حیات

سیرتِ سیدِ عالمﷺ نے وہ بخشی رِفعت

اوج در اوج اُبھرتا گیا معیارِ حیات

یا نبیؐ! تیرے ہی صدقے میں ہے دنیا قائم

سچ تو یہ ہے کہ تِریؐ ذات ہے مختارِ حیات

سرد مہری کے سِوا خلق میں کچھ اور نہ تھا

تیرےؐ آنے سے بڑھی گرمئ بازارِ حیات

حشر ہے تیریﷺ شفاعت کا اُمڈتا دریا

موت ہے ایک حقیقت، پسِ دیوارِ حیات

جب تک آئے نہ قدم تیرے شہنشاہِؐ عرب

فصلِ گُل سے نہ شناسا ہُوا گُلزارِ حیات

اِک تِرےؐ عِشق میں مُضمر ہے حیاتِ ابدی

اِک تِرےؐ نام پہ مَرتے ہیں طلبگارِ حیات

میں بھی تو ایک مسافر ہُوں سرِ راہِ طلب

ایک نظر مُجھ پہ بھی اے قافلہ سالارِ حیات

تیرےؐ جلووں پہ ہے قرباں یہ نصِیرِ شیدا

تُوﷺ ہے کونین میں آئینۂ اسرِار حیات

سید نصیرالدین نصیر