اپنے کام سے کام رکھا
فیضِ محبت عام رکھا
اہلِ جہاں کی خاطر بس
ارزاں اپنا دام رکھا
رزق کا پتھرعمر تمام
صبح اٹھایا، شام رکھا
آخری سانس سے قبل ذرا
ہاتھ سے ہم نے جام رکھا
حرف نہ آئےآن پہ کچھ
دھیان یہ ہر ہر گام رکھا
کس کس طور نہ مچلا دل
لیکن اس کو تھام رکھا
پہلے دکھائی راہِ عشق
کیا کیا پھر الزام رکھا
تا کہ تجھ پر بار نہ ہو
نالۂ دل کو خام رکھا
اس بے فکر کی فکر نے ہی
مجھ کو بے آرام رکھا
میں وہ سخن ہوں جس کے بیچ
دانستہ ابہام رکھا
پیکر بے کل ایک بنا
ہجر نے آصف نام رکھا
آصف اکبر جیلانی
No comments:
Post a Comment