پرزے پرزے تو کر دیا مجھ کو

پرزے پرزے تو کر دیا مجھ کو

مثلِ تصویر اب جلا مجھ کو

دیکھ آیا ہوں آئینے سارے

کوئی چہرہ بھی اب دِکھا مجھ کو

دیکھ مجھ میں شرار کتنے ہیں

آب و گِل میں ذرا مِلا مجھ کو

سُرمئ بارشوں کو کھڑکی سے

اچھا لگتا ہے دیکھنا مجھ کو

آسماں کے اُداس کینوس پر

بادلوں کی طرح بنا مجھ کو

سارے اسباق کر لیے ازبر

ابجدِ عشق بھی پڑھا مجھ کو

اپنی آنکھوں سے مجھ کو رونے دے

اپنے ہونٹوں سے مُسکرا مجھ کو

اس نے خُوشبو بنا کے چھوڑ دیا

اب اڑاتی پھِرے ہوا مجھ کو

اچھا خاصا تھا آدمی پہلے

راس آیا نہ ارتقأ مجھ کو

کیوں گِرایا تھا آسمانوں سے

آ، نشیبوں سے اب اٹھا مجھ کو

میں درختوں کا خواب ہوں ناصرؔ

اپنی آنکھوں سے اب اُگا مجھ کو

نصیر احمد ناصر