روز دل پر اک نیا زخم آئے ہے

روز دل پر اک نیا زخم آئے ہے

روز کچھ بارِ سفر بڑھ جائے ہے

کوئی تا حد تصور بھی نہیں

کون یہ زنجیرِ در کھڑکائے ہے 

تیرے افسانے میں ہم شامل نہیں

بات بس اتنی سمجھ میں آئے ہے

وسعتِ دل، تنگئ جاں بن گئی

زخم اک تا زیست پھیلا جائے ہے

جھوم جھوم اٹھی صبا کے دھیان میں

کتنی مشکل سے کلی مرجھائے ہے

زندگی ہر رنگ میں ہے اک فریب

آدمی ہر حال میں پچھتائے ہے

گاہ صحرا سے ملے پانی کی موج

گاہ دریا بھی ہمیں ترسائے ہے

میری صورت تو کبھی ایسی نہ تھی

آئینہ کیوں دیکھ کر شرمائے ہے

باقیؔ اس احساس کا کوئی علاج؟

دل وہیں خوش ہے جہاں گھبرائے ہے

باقی صدیقی